Job Shadowing na Escola Secundária Augusto Gomes de Matosinhos

Nos días 22 a 26 de abril visitei a Escola Secundaria Augusto Gomes, situada na cidade de Matosinhos.  

O principal obxectivo da visita foi realizar unha aprendizaxe por observación das dinámicas empregadas na escola así como establecer un contacto inicial para colaborar no marco dos proxectos Erasmus+ entre as dúas escolas.

A escola

Aínda que a escola ten xa máis de 50 anos, o edificio foi renovado practicamente por completo hai 12 anos, ofrecendo unhas das instalacións escolares máis modernas da cidade.

A escola está composta por unha serie de módulos distribuídos da seguinte maneira:

• Área de alumnos: tres bloques con aulas, laboratorios, polideportivo, salón de actos, etc.
• Área de profesorado: sala de profesores, despachos e aula de reunións.
• Área de administración
• Area de dirección
• Área de servizos:  biblioteca, tenda de reprografía e cantina.

Na súa oferta formativa se atopan o ensino básico e secundario, equivalente á nosa ESO e Bacharelato, cursos profesionais (en xestión e programación de sistemas informáticos en comercio e en turismo) e cualificación de adultos, chegando a case 1.500 alumnos entre todos os cursos.

A visita

Primeiro día

O primeiro dia de visita comezou cunha recepción e reunión coa equipa directiva do centro. A directora Drª Margarida Pereira, xunto cos resto da equipa directiva formada polas Dr^as Helena Captivo, Isabel Duarte e Sandra Gomes, foron as encargadas de recibirme e explicarme a historia e as actividades da escola.

Despois dunha visita polas instalacións tiven a oportunidade de asistir á presentación das Probas de Aptitude Profesional dos alumnos do último ano do curso profesional de informática. Estas probas consistían en proxectos elaborados no último curso para desenvolver páxinas web, aplicacións web ou incluso videoxogos, empregando linguaxes como HTML, PHP, Java Script, Unity ou Unreal Engine.

Entre estes proxectos foi destacado, tanto polo seu nivel de desenvolvemento como pola súa aplicación real e comercial, un proxecto de seguimento dos autobuses urbanos para coñecer os tempos de espera nas paradas e de viaxe.

Segundo día

O segundo día centrei a visita nas aulas de informática.

Na primeira aula visitada, os alumnos do 12º ano (2º Bacharelato) estaban a realizar un proxecto de edición de vídeo, fotografía e animación. Cada parella de alumnos escollía un tema e realizaba unha busca de información previa para poder elaborar un guión do que sería o proceso de elaboración do produto final. Como dato de interese, todos alumnos contaban cun ordenador portátil xa que a escola facía o préstamo dun ordenador para todo o curso a cada alumno.

Na segunda aula visitada os alumnos estaban a aprender Adobe Ilustrator e Photoshop. Para iso, ademais do seu profesor, os alumnos contaban cun experto invitado que explicaba de forma práctica o funcionamento destes programas. A clase era completamente práctica, e entre o profesor e o experto supervisaban o traballo dos alumnos, o cal consistía no deseño de súper heroes empregando distintas técnicas de edición de imaxe.

Para rematar a visita tiven a oportunidade de falar con dúas alumnas do mestrado de profesorado, as cales me explicaron como funciona o sistema de acceso á profesión docente en Portugal. Aínda que con algunha diferencia respecto ao noso sistema, en Portugal os estudantes universitarios poden escoller nas súas carreiras a especialización docente, na cal teñen que realizar unhas prácticas en escolas durante case un curso académico, asistir a seminarios e realizar unha tese de mestrado para obter finalmente a habilitación docente.

Terceiro día

No terceiro día visitei as aulas de español cos alumnos máis novos e conversamos un pouco sobre a cultura e gastronomía galega e española. Entre todos eliximos a tortilla de pataca como prato máis representativo da gastronomía española e os aprenderon algúns consellos para cociñala. O debate se debía levar cebola ou non quedou sen resposta clara, como adoita ser habitual.

Aproveitando a conmemoración do 50 aniversario do 25 de abril en Portugal, os alumnos realizaron unha obra de teatro representando os feitos máis importantes que levaron á Portugal á revolución dos caraveis. Xunto con esta homenaxe, ademais dos centros de  caraveis que decoraban a escola, os alumnos cantaron e recitaron poemas para celebrar a restauración da democracia.

Xa na tarde, fun invitado a participar no obradoiro “De deuses e heróis” con profesores e alumnos, no que falamos da lingua galega. Comparamos as semellanzas e diferencias entre o galego e o portugués, falamos un pouco da súa historia e do seu estado actual, e concluímos que a comunicación entre as nosas dúas linguas era case perfecta sen termos que facer grandes esforzos.

Cuarto día

O cuarto día coincidiu co 25 de abril, día feriado en Portugal pola conmemoración da revolución dos caraveis. Nesta ocasión celebrábase o 50 aniversario da chegada da democracia e como non podía ser doutra forma, a cidade estaba completamente adornada con caraveis vermellos, bandeiras portuguesas e actos festivos na maioría das prazas.

Quinto día

Xa no último día de visita aproveitei para visitar unha aula práctica de bioloxía. Nela os alumnos realizaron un experimento de simulación de lava a distintas temperaturas, medindo viscosidade e velocidade das lavas e realizaron un informe coa análise dos resultados que enviaron ao profesor a través da aula virtual.

Tamén puiden ver a biblioteca en funcionamento, cunha actividade de dinamización na que os alumnos do último ano explican acontecementos históricos do 25 de abril aos alumnos de cursos máis baixos. Ademais destas actividades a biblioteca realiza outras actividades durante o curso como os desafíos científicos nos recreos, actividades de voluntariado, conmemoracións ou lectura de contos aos pequenos.

Para finalizar a visita fixemos unha comida de despedida nunha marisqueira con parte da equipa directiva.

Reflexión final

Como conclusión só podo dicir que esta experiencia foi excelente e moi produtiva. Tanto o trato recibido como a oportunidade de compartir experiencias entre as dúas escolas permitiu establecer un punto de contacto e de colaboración co país veciño para futuras mobilidades nos proxectos europeos.  

Por último, agradecer a amabilidade dos profesores da escola e en especial da Drª Margarida e Drª Sandra polo tempo dedicado e as explicacións a todas as miñas preguntas e dúbidas.