Job Shadowing no ITS ITC Piemonte (3)

AR/VR and Game Developer

Na Galiza temos o ciclo equivanlente só na Coruña, vinculado á familia profesional de Audivisuais. Tamén existen dous cursos de especialización de Informática en Lugo e Ourense. Aquí está a información do ciclo que poden cursar en Turín.

Crear produtos en 3D e realidade virtual ou aumentada, pareceume moi interesante e non só desde o punto de vista lúdico, senón tamén educativo e deume algunha idea para posibles futuros obradoiros.

Durante a miña estancia no ITS ITC Piemonte, asistín ás clases destes módulos:

Unity 3D

Hoxe coñecín o funcionamento desta ferramenta e de novo aprendín moito vocabulario técnico e frases en italiano. Comezamos por revisar as doce regras da animación e despois o alumnado creou un trigger para un traballo previamente feito, ligándoo á pulsación dunha tecla, usando código C#.

O seguinte exercicio consistiu na creación dun obxecto que se movía nos eixos X e Z. As animacións foron creadas a partir de keyframes, por interpolación. Este método funciona moi ben cos NPCs pero tamén implementaron un trigger para activar e desactivar o movemento no eixo Z ao premer unha tecla.

Principi di Modellazione 3D

Nesta clase tocaba consegna de traballos de modelado feitos en Autodesk despois de teren aprendido a deseñar figuras tipo Lego. O desafío era recrear escenas famosas de filmes, seguindo estes pasos:

• Modelaxe a base de figuras xeométricas.
• Situación da cámara, é dicir, do punto de vista.
• Inserción de luces e sombras.
• Gessato: pintar as superficies coa mesma cor e axustar as luces e sombras, proporcións, etc. Neste punto é cando se lle presenta o traballo ao cliente para corrixilo e obter o seu visto e prace antes de continuar.
• Escoller o material (aceiro, plástico, madeira, etc) o que inflúe en como vair reflectir a luz, por exemplo.
• No final insírese unha textura desde un ficheiro externo. Pode ser un granulado, ladrillos, unha imaxe concreta como un cadro, a cara da figura de Lego, etc. Websites de descarga recomendados: polyhaven.com  e textures.com
• Despois hai que renderizar e aínda se pode retocar (postprodución) o contraste e outros parámetros usando ferramentas como GIMP. O resultado podería usarse, por exemplo, como escenario noutro proxecto de Unity 3D.