Durante tres meses tiven a oportunidade de realizar as prácticas do ciclo de Desenvolvemento de Aplicacións Web (DAW) en Taranto, unha cidade situada no sur de Italia. Decidín participar no programa Erasmus porque me parecía unha boa oportunidade para adquirir experiencia profesional no estranxeiro, mellorar o meu inglés e coñecer unha cultura diferente mentres traballaba no sector no que me quero dedicar.
A empresa
Realicei as prácticas en Nasse Animation Studio, un estudo dedicado á animación. Aínda que a actividade principal da empresa non estaba centrada no desenvolvemento web, durante a miña estancia encargueime da creación e mantemento das súas páxinas web. Desenvolvín tanto a web principal da empresa como outras páxinas relacionadas con diferentes proxectos nos que estaban traballando.
Foi unha experiencia moi positiva porque puiden aplicar os coñecementos adquiridos durante o ciclo de DAW en proxectos reais. Ademais, os compañeiros da empresa fixéronme sentir moi cómodo desde o primeiro día e foi doado crear unha boa relación con eles. Sen dúbida, unha das mellores partes da experiencia foi precisamente coñecer ás persoas coas que traballei.
Aloxamento
Durante a estancia compartín un piso co meu compañeiro de Erasmus. Era un apartamento de dúas habitacións que estaba bastante ben equipado e no que estivemos moi cómodos durante os tres meses.
O único inconveniente era que estaba algo afastado do lugar de traballo, polo que todos os días tiñamos que camiñar un bo anaco para chegar á oficina. Aínda así, nunca supuxo un problema importante e tamén nos servía para coñecer mellor a cidade.
Transporte
A maior parte dos desprazamentos facíaos andando. Taranto ten un tamaño semellante ao de Santiago de Compostela, polo que é bastante cómodo moverse a pé para ir ao traballo ou visitar diferentes zonas da cidade.
Para os desprazamentos máis longos, como cando iamos ao centro comercial, utilizabamos o autobús urbano, que resultaba unha opción práctica e económica.
A cidade
Taranto sorprendeume moito. Antes de viaxar non coñecía practicamente nada sobre ela, pero unha vez alí descubrín unha cidade con moita historia e cun patrimonio moi interesante. Chamoume especialmente a atención a historia relacionada co Atleta de Taranto e as lendas sobre a fundación da cidade.
Tamén me gustou moito o ambiente e a forma de vivir dos italianos. A gastronomía foi, sen dúbida, un dos aspectos que máis desfrutei durante toda a estancia. Poder probar a auténtica cociña italiana todos os días foi unha das mellores experiencias do Erasmus.
Por outra banda, unha das cousas que máis me sorprendeu foi que moitas das persoas que vivían en Taranto non valoraban demasiado a súa cidade. Comentábannos que había poucas oportunidades laborais e preguntábannos con frecuencia se escolleramos nós ese destino ou se simplemente nos tocara. A pesar desa percepción dos propios habitantes, a miña experiencia foi moi positiva.
Turismo
Durante os tres meses tamén tiven a oportunidade de visitar outros lugares da rexión. A miña familia veu pasar uns días comigo e aproveitamos para facer varias excursións.
Visitamos Alberobello, famoso polas súas casas tradicionais chamadas trulli; Locorotondo, un pequeno pobo moi bonito con rúas brancas e un centro histórico moi ben conservado; e tamén Brindisi, unha cidade costeira con moita historia e un paseo marítimo moi agradable.
Estas viaxes permitíronme coñecer mellor o sur de Italia e descubrir lugares que probablemente non visitaría noutras circunstancias.
Conclusión
En xeral, considero que foi unha experiencia moi enriquecedora tanto no ámbito profesional como no persoal. Ademais de adquirir experiencia desenvolvendo páxinas web para unha empresa real, mellorei a miña autonomía, coñecín persoas doutros lugares e puiden descubrir unha parte de Italia bastante diferente da imaxe que normalmente temos do país.
Recomendaría realizar un Erasmus en Taranto a calquera estudante que teña a oportunidade. A pesar de que non é un destino especialmente coñecido e de que os propios habitantes adoitan ser bastante críticos coa súa cidade, penso que precisamente iso fai que a experiencia sexa diferente. É un lugar con moita historia, boa gastronomía e un ritmo de vida tranquilo, no que se pode aprender moito tanto dentro como fóra do traballo. Sen dúbida, volvería repetir a experiencia.
