Os días 11, 12 e 13 de maio de 2026 tiven a sorte de participar nunha estadía en Matosinhos, no centro que arriba se indica. Os meus obxectivos xiraban en torno a internacionalizar os ciclos que imparto ao facer contactos con compañeiros deste centro; a mellorar a miña comunicación en lingua inglesa e en lingua portuguesa no intercambio; e a identificar boas prácticas en xeral, e en concreto as relacionadas co ensino das linguas, en especial as estranxeiras, e sobre todo o inglés, co obxectivo de implementalas no noso centro.
A experiencia foi absolutamente positiva. Os compañeiros recibíronme marabillosamente, mostráronme as instalacións do centro educativo, e facilitándome non so asistir a aulas de profesorado especialista en lingua inglesa, senón tamén a unha aula de lingua portuguesa e a unha de lingua española. Podo testemuñar o interese que suscita no alumnado deste centro a lingua galega, e a valoración positiva de alumnado e profesorado nos meus intentos de comunicarme en lingua portuguesa. O profesorado do departamento de lingua inglesa ao que acompañei permitiume non so asistir ás súas sesións, senón tamén participar activamente co alumnado en varias actividades comunicativas en inglés.
Dende o centro fomentouse que ampliara o meu coñecemento da lingua e cultura portuguesa invitándome a actividades realizadas na escola para profesorado e alumnado (por exemplo a participar no xogo de Pickleball) e facilitando información sobre actividades culturais que puiden realizar unha vez rematada a xornada no centro educativo, en Matosinhos e en O Porto.
Sexa como for, quero agradecer aos compañeiros e compañeiras da Escola Secundária Augusto Gomes polo trato recibido, en especial a Sandra Gomes, adjunta de direçao, que facilitou todo o proceso previo á estadía e fixo de enlace co resto dos compañeiros e compañeiras mentres estiven alí. E tamén agradecementos para os coordinadores Erasmus+ do IES San Clemente, en especial a Carlos Doval pola súa paciencia comigo en todo o proceso.
Para rematar, quero animar ao profesorado que teña en mente participar nunha experiencia semellante, xa que ao meu parecer é unha experiencia que merece a pena vivir a nivel persoal e profesional.
